В заголовках  В тексте
Чәршәмбе, 28 Декабрь 2016 14:37

Nataliä Fişman: «Parklarnı döres itep qullana belergä dä kiräk»

Nataliä Fişman: «Parklarnı döres itep qullana belergä dä kiräk» foto: president.tatarstan.ru, Salawat QAMALETDİNOV

«Yaña yılğa diñgezgä alğan yullamamnı kire tapşıraçaqmın», – di Tatarstan Prezidentı yärdämçese Nataliä Fişman. Dimäk, ul Yaña yıl bäyrämen respublikada qarşılarğa cıyına.


Yaña yılğa monda qaluınıñ da säbäbe yuq tügel. Äle 25 dekaberdä Ğorki-Ämät urman-parkı açılğannan soñ ber könne barıp anıñ torışın tikşergän. Çönki äle tege ciren cıyıştırıp betermägännär, äle bu ciren açıp betermägännär...


 

Tatarstanda inde ikençe yıl rättän park häm skverlarnı yañartalar. Misal öçen, 2016 yılda respublikabıznıñ 36 munitsipal' rayonında 43 park tözekländerelgän. Şularnıñ 28yı – yaña obyektlar. Uzğan yıl tözekländerelä başlağan 15 parknı da bıyıl yañartunı däwam itkännär.

Älbättä, respublika öçen bu sannar şaqtıy zur. Çönki şulqädär küp eşne moña qädär Mäskäw genä başqarıp çığa alğan. Ä başqa töbäklärneñ äle Tatarstannı quıp citä alğanı yuq.


2016 YILNIÑ İÑ UÑIŞLI PROYIKTLARI


– İñ yaratqan proyektlarımnıñ berse – Ğorki-Ämät parkı. Äytergä kiräk, soñğı 50 yıl eçendä ul – ör-yañadan tözelgän park. Ägär başqa parklarda bez yañartu eşläre belän şöğellänsäk, monda isä saqlanıla torğan tabiğät zonasın da qaldıra aldıq. Toraq massivlarğa çığu öçen küperlär yasadıq. Yal könnärendä genä tügel, atna başı – düşämbedä dä biregä xalıq yaratıp kilüe söyenderä, – dip söyli Nataliä Fişman.




Qazanda bıyıl tağın Krıl'ya Sovetov, Uritskiy isemendäge parklar açıldı. Soñğısı buyınça xalıq belän dä oçraşular küp uzdı. Ägär bıltır Uritskiy parkı belän bik küp bäxäslär kilep çıqsa, xalıq belän oçraşular tä'sir itmi qalmağan, axrısı. Fişman süzlärençä, bıyıl ber naçar fiker dä işetergä turı kilmägän. Ä Täteştä isä park proyektın studentlar üzläre proyektlaştırğan.


ROSSİÄ TÜRÄLÄRE TATARSTANNI MAQTIY


«Sberbank» analitikları Tatarstandağı iñ uñışlı öç proyektnı atağan. Şunısın da assızıqlap ütärgä kiräk: Universiada, Su sportı törläre buyınça dönya çempionatı belän bergä Park häm skverlar programması da älege isemlektä urın alğan.

Tatarstanda park-skverlarnı, yar buyların, yağni cämäğät urınnarın tözekländerü näticälären Rossiä däräcäsendä dä kürälär. «Tatarstan cämäğät urınnarın üsterü buyınça zur näticälärgä ireşte. Sezneñ täcribägezne bez böten il buyınça tarataçaqbız», – dip beldergän Rossiä Tözeleş häm toraq-kommunal' xezmät ministrı urınbasarı Andrey Çibis. Nataliä Fişmannı inde başqa töbäklär dä üzlärenä cälep itep qarağan. Tik barıp qına çıqmağan.


2017 YILĞA PLANNAR NİNDİ?


2016 yıl däwamında park proyektları buyınça xalıq belän bergäläşep fiker alışu – yäşel zonalarnı buldırğanda möhim elementlarnıñ berse. Çönki şulay bulğanda ğına xalıq häzm xäkimiät arasında dinamika barlıqqa kilä. Rayon başlıqları da xalıqnıñ fikere belän tanışa ala.
 


2017 yılğa isä plannar zurdan. Planlaştırılğan 57 obyekt arasında 32 park, 17 yar buyı, 4 mäydan, 4 uram bar. Çerek kül parkın da tulısınça tözekländerep beterergä cıyınalar.



Xäzerge waqıtta park häm skverlarnı tözekländerü genä tügel, ä anda aktivlıq mäydançıqların buldıru da töp mäs'älälärneñ berse bulıp tora. Şunısın da äytergä kiräk: park-skverlarnı yañartu – ber xäl, ä alarnı qarap-çistartıp tormasañ, maturlıq ber mizgeldä yuqqa çığarğa mömkin. Şul säbäple, Tatarstandağı yal itü zonaları yañartılu belän munitsipal' berämleklär qaramağına tapşırıla. Şuña kürä alarnıñ torışı, qullanılışı buyınça da cawaplılıq alar östendä bulıp çığa.

- Urınnarda kilep çıqqan texnik awırlıqlar, älbättä, bulmıy qala almıy. Çeterekle mäs'älälärne citäkçelär belän utırıp söyläşep xäl itäbez. Ämma kiläse yılğa minem töp burıçım – parklarnı qullanu, kommertsiä mäs'äläse belän kilep tuğan problemalarnı çişü. Bez bu zonalarnı döres itep tözekländerergä öyrändek. Xäzer inde anı döres itep qullana belergä dä kiräk. Şulay uq alarda mädäni programma belän dä bayıtu da zarur, – di Prezident yärdämçese.
 



Märäm Ğalimullina, Qazan:

- Döresen genä äytkändä, Ğorki-Ämät parkın şul qädär däräcädä yaxşı bulır, dip uylamağan idem. Şäxsän bezneñ ğailägä bu parkta oşadı. Matur itep bizälgän, tamaq yalğarğa kafesı da bar. Keşe da az. Monnan soñ Gor'kiy isemendäge üzäk mädäniät häm yal parkına yörmäskä digän fikergä dä kildek. Çönki Ğorki-Ämät parkı bez yäşägän yorttan yıraq tügel genä urnaşqan.


 



Liliä Ğilmetdinova, Quqmara:

- Moña qädär Quqmarada yal itü urınnarı ber dä yuq ide. Ä bıyıl isä beryulı şundıy öç urın barlıqqa kilde. İke park, Norma yılğası yar buyı berqayçan da buş tormıy, anda härwaqıt keşe ağıla. Misal öçen, Yal parkında köndez balaları belän äti-änilär yal itsä, kiçlären – yäşlär. Üzäktä urnaşqan Lenin parkında isä buqkrossinğ kiştäse bar: monda keşelär üzläre uqığan kitapları belän büleşä. Citmäsä, awıl xalqın da yış küräbez bu urınnarda. Alar da yıraqtan kilergä irenmi. Äle alay ğına da tügel: Quqmara parklarında yal itüçe Saba belän Mamadış rayonnarında yäşäwçelärne dä küräbez. Döresen genä äytkändä, parklarnı çista itep totarlar, dip ışanmağan idek.

 



Läysän Zinnätullina, Apas:

- Allağa şöker, bıyıl Apas xalqı parklı buldı. Cäy köne biredä fontan bulsa, qışın anıñ urınına, bezneñ balaçaqtağı kebek, zur qupşı çırşı quydılar. Anıñ yanınnan sabıylarnıñ özelgäne dä yuq. Yaqın-tirägä qar sınnarı da yasadılar. Ğomumän alğanda, park xäzerge waqıtqa turı kiterelep yasalğan. Biredäge yaqtırtqıçlarğa qädär zamança. Könenä ike-öç tapqır şuşı parkta bala belän yal itäbez. Balalar mäydançığın tulısınça yañarttılar. Xätta iñ näni balalarğa da atınğıçlar quydılar. Ni qızğanıç, bu maturlıqnı xalıq qına saqlıy belmi, inde berniçäsen cimerergä ölgerdelär.


 


Alinä MİNNEVÄLİEVA

Yazmanı bäyalägez
(0 tavışlar)
Ukılgan 486 märtäbä Soñgı üzgärtü Пәнҗешәмбе, 29 Декабрь 2016 12:03
Fiker kaldırırga

Kiräkle mäglümat (*) kertügezgä inanıgız (
HTML-kodlar tıelgan)


Татар-информ яңалыклар

  • БАРЛЫК ХӘБӘРЛӘР
  • ТАТАРСТАН
  • РОССИЯ

Latin imlasına küçerüçe programma avtorı – N.Timerğäliev