В заголовках  В тексте
Чәршәмбе, 11 Гыйнвар 2017 15:19

Pley-off ise kilä: «Aq Bars» köndäş saylamıy (video)

Pley-off ise kilä: «Aq Bars» köndäş saylamıy (video) İlnar TUXBATOV fotoları

QXLda daimi çempionatnı tögällärgä sanawlı ğına uyınnar qalıp kilä. Soñğı tur 18 fevral'gä bilgelängän. Tatarstan komandalarınıñ çempionat finişına qädär 11 matç uzdırası bar. Annarı – pley-off. «Aq Bars»nıñ anda qatnaşuı şik tudırmasa da, «Nefteximik» öçen pley-off bügen ük başlandı disäk tä bula: Tübän Qama komandası «könçığış»ta berençe sigezlekkä kerü öçen tırışa. Intertat.ru xäbärçese könnän-qın qıza barğan boz tiräsendäge xällär belän tanıştı.


OFIQTA – PLEY-OFF


Liganıñ Könbatış konferentsiäsendä berençelärdän bulıp pley-offta qatnaşu xoquqın TSSQA belän SQAnıñ yawlawı ğäcäp tügel. Xäyer, Tatarstan xokkey tamaşaçıları öçen kürşedäge xällär ikençel däräcädäge mäs'äläder. Barıbıznı da üzebezdäge wäzğiät qızıqsındıra. Anısında da Ğağärin kuboğı öçen köräşkä «yullamalar» öläşenä başladı. Soñğı turda «Aq Bars»nı otıp «Metallurğ» sezonda 32 nçe ciñüen bäyräm itte häm «könçığış»ta pley-offqa yullama otqan berençe komanda buldı. «Sorawlar bar, – dip äytep quydı ul waqıtta «Aq Bars»nıñ baş trenerı Zinnätulla Bilaletdinov. – Alarnı tözätergä kiräk».

Turnir tablitsasına küz salsaq, bügenge näticäle uyının yuğaltmağan oçraqta, çempionat finişına qädär «Aq Bars» üz urının yuğaltmas, möğäyen. Konferentsiä liderı – «Metallurğ» komandasınıñ ükçäsenä basarlıq tügel inde. Anı quıp totu, çempionat azağınıñ ber moğcizası bulır ide. Bügenge öçençe urınnı yuğaltu öçen dä şaqtıy «tırışırğa» kiräkter. Şuña da Qazan klubı pley-offnıñ berençe raundında «Metallurğ», «Awanğard», «Traktor» häm «Salawat Yulayev» belän oçraşu ixtimalı yuq däräcäsendä.



Köndäşlär kem bulırğa mömkinme? Telgä alınmağan barlıq komandalar da! Teoretik yaqtan äle ber genä komanda da pley-offta qatnaşu mömkinlegennän qolaq qaqmadı. «Aq Bars» alarnı saylamıy, üzläre kilep qapsa ğına.

– Könçığış konferentsiädä bıyıl mawıqtırğıç köräş kötelä. «Mağnitqa» tärtiptä, «Aq Bars» bıyıl sizelerlek köçäyde, «Awnğard» ta naçar tügel, – di bu uñaydan tanılğan xokkey belgeçe Sergey Ğimayev. – Ayırım alğanda, «Aq Bars» – bik qurqınıç. Alar bıyıl kimendä finalda uynaw turında xıyallana kebek. Maqsatları yuğarı.     
 




«AQ BARS»NIÑ ALDAĞI UYINNARI


Çittä:
12.01. 19:30. «Lokomotiv».
14.01. 17:00. «Witäz».
16.01. 19:30. «Dinamo» (Mäskäw).

Qazanda:
18.01. 19:30. «Salawat Yulayev».
25.01. 19:00. «Sibir'».
27.01. 19:00. «Metallurğ» (Novokuznetsk).


«NEFTEXİMİK»NIÑ ALDAĞI UYINNARI


Çittä:
12.01. 19:30. «Dinamo» (Mäskäw).
14.01. 17:00. «Lokomotiv».
Tübän Qamada
19.01. 19:30. «Slovan».
23.01. 19:00. «Sibir'».
25.01. 19:00. «Metallurğ» (Novokuznetsk).

 



ÄYDÄ, BER DOĞA!..


Yulğa quzğalır aldınnan utırıp ber doğa qılırğa künegelgän kebek, soñğı waqıtlarda «Aq Bars» komandası çittäge, qaywaqıt üzendäge uyınnar seriäse aldınnan açıq künegülär uzdıru, qäläm ähelläre belän aralaşıp alunı ğädätkä kertep mataşa. Bu yulı mondıy çara Yaroslavl', Mäskäw ölkäse häm Mäskäwgä yasalaçaq säfärgä quzğalırğa ber kön qala oyıştırıldı. Soñğı ike uyında töp köndäş sanalğan komandadar – «Salawat Yulayev» belän Mağnitoğorskinıñ «Metallurğ» komandasına ottırğannan soñ alda torğan matçlarğa äzerlek tağın da zur qızıqsınu uyata.

– Üzebezdäge soñğı uyınnar xaqında başta uq qızıqlı bulaçaq, dip beldergän idem. Köçle komandalarğa qarşı matçlarda komandanıñ problemaları kürenä, – dip söyläde Zinnätulla Bilaletdinov. – Äye, citärlek oçko tuplap bulmadı. Ämma, minemçä, uyınıbıznı yaxşırtu yulında tuğan sorawlarnı çişep kiläbez. Älege uyınnardan çığıp komandağa nindi bäyä birergäme? Tiskäre häm uñay küreneşlär dä bar. Komanda belän barısı da yaxşı dip äytä almıym. Ğomumän alğanda, tulayım uyın kartinası bar häm bez anıñ kimçelekle yaqların da küräbez.



– Soñğı uyınnarda qapqanı Emil Ğäripov saqlıy. Pley-off öçen qapqaçını açıqladığızmı inde?

– Bez Emil xäzerge waqıtta köçleräk uynıy, digän fikerdä. Şuña da aña bu etapta kübräk mömkinlek biräbez. Stanislav Ğalimov ta yaxşı eşli häm härwaqıt uyınğa çığarğa äzer.

...«Aq Barsnıñ açıq künegülärendä 29 xokkeyçı qatnaştı. Berençelärdän bulıp bozğa qapqaçılar – Stanislav Ğalimov, Emil Ğäripov häm Artur Misbaxov çıqtı. Alar belän qapqaçı trenerları Sergey Abramov häm Ari Moysanen, şulay uq saqçılar Albert Yarullin belän Damir Musin şöğellände.

Künegülärgä yäşlär arasında dönya çempionatında bronza medal' yawlap qaytqan saqçı Mixail Sidorov ta bar ide.

– Bezne «kömeş» kenä tügel, altın medal'dän dä ber genä adım ayırıp tordı, – dip iskä ala Mixail çempionatnı. – Finalğa çıqsaq, Kanada komandasın otqan bulır idek. Medelle bulu yaxşı, ämma bez – xokkeyçılar häm trenerlar da ciñärgä telägän idek. Bäxet az ğına çitläp uzdı. Tormışta andıy xällär dä bula. «Bronza» otıp, turnir azağında üzebez turında yaxşı tä'sirlär qaldırdıq.


 

Töp sostav belän künegülärdä yuğarı xokkey ligasında çığış yasawçı «Bars» komandasınnan Maksim Lazarev belän Dmitriy Arxipov ta qatnaştı. Ä menä 22 yäşlek tağın ber saqçı Roman Abrosimovnı kürep bulmadı. Baqtıñ isä, ul imgängän xokkeyçılar isemlegenä kertelgän ikän.

– Roman Abrosimov awırıy, – dip açıqlıq kertte baş trener. Maksim Lazarev belän Dmitriy Arxipovnı töp sostavqa çaqırtu turında soraşqaç: «Sağındım üzlären», – dip yılmaydı ul.


SOSTAV TOTRIQLIMI?


Künegülär waqıtında uyınçılarnıñ nindi kiemnän şöğellänüenä küz taşlasaq, «Aq Bars»nıñ yaqındağı uyınnarda nindi sostavta uynayaçağın çamalarğa bula. Yäşel kiemdä: Vasiliy Toqranov – Stepan Zaxarçuq, İrji Sekaç – Aleksandr Switov – Djastin Azevedo; sarılar: Zıyat Paygin – Mixal Yordan, Dmitriy Arxipov – Denis Xlıstov – Väçeslav Soloduxin – Maksim Lazarev; zäñgärlär: Albert Yarullin – Atte Oxtamaa; Artöm Luqoyanov – Vladimir Tqaçöw – Andrey Çibisov; qızıllar: Mixail Sidorov – Damir Musin; Dmitriy Obuxov – Födor Malıxin – Mixail Warnakov; qızğılt-sarılar: Stefan Elliott – Rafael Batırşin, Anton Ğlinkin – Andrey Popov – Mixail Ğluxov.




Nindi genä komanda, nindi genä sostavta çığış yasasa da, uyınçılarğa qarata çittän soraw bulaçaq. Sezon däwamında «Aq Bars» sostavı da üzgäreşlär kiçerä. Dekaber ayında komandağa höcümçelär – Denis Xlıstov, Väçeslav Soloduxin häm Yevgeniy Ğriğorenko kebek uyınçılar kilep quşıldı. Şul uq waqıtta Denis Golubev kebek üz yegetlärebez «Bars»qa ozatıla.

– Denis Golubevnıñ «Aq Bars»qa äylänep qaytu mömkinlege zurmı, disezme? – di Bilaletdinov. – Üzem dä äytä almıym.

...Qalğan 11 uyınnıñ «Aq Bars» öçesen genä üz bozında uzdıra. Pley-off aldınnan bu komandağa tiskäre tä'sir itmäsme? Bügen küplärne älege soru borçıy. Baş trener şik-şöbhälärne quıp taratırğa kiräklege xaqında iskärtä. «Bu uyınçılarğa berniçek tä tä'sir itmi, – di ul. – Äzerlänäbez häm eşlibez. Xäzer qalğan uyınnarda ciñü yawlarğa kiräk. Läkin kübesençä pley-offqa äzerlek bara».

Pley-off dimäktän, xälitkeç uyınnar bügen başlansa, «Aq Bars» berençe raundta Astananıñ «Barıs» komandası belän turı kiler ide. Finişqa qädär üzgäreşlär bulaçaq äle. Kem belä, bälki QXLda täwge sezonın uzdıruçı Qıtaynıñ «Qunlun» komandası belän dä oçraşırğa turı kiler äle.

– Qıtay klubı, disezme? Bu xaqta uylağan da yuq, – di imgänü säbäple soñğı matçta uynıy almağan, inde xäzer qabat bozğa çığarğa äzer bulğan höcümçe Anton Ğlinkin. – Turnir tablitsasına qaramıybız da. Berençe çiratta ciñü turında uylıybız. Çempionat tögällängäç, pley-offtağı köndäş tä bilgele bulır.

...«Aq Bars» irtägä Yaroslavl'dä cirle «Lokomotiv» belän bulaçaq uyınğa säfärgä quzğaldı. Väçeslav Soloduxinnan qala açıq künegülärdä qatnaşqan uyınçılarnıñ barısı da sostavqa eläkte.


Färit SALİXOV

Yazmanı bäyalägez
(0 tavışlar)
Ukılgan 106 märtäbä Soñgı üzgärtü Чәршәмбе, 11 Гыйнвар 2017 23:01
Fiker kaldırırga

Kiräkle mäglümat (*) kertügezgä inanıgız (
HTML-kodlar tıelgan)


Татар-информ яңалыклар

  • БАРЛЫК ХӘБӘРЛӘР
  • ТАТАРСТАН
  • РОССИЯ

Latin imlasına küçerüçe programma avtorı – N.Timerğäliev